Le Grand Cyrus partie 1

 foiblesse, avoit laissé tomber aupres de luy : et s'esloignant d'un Ennemy, qui n'estoit pas en estat de
 satisfaire sa vangeance, apres avoir satisfait sa curiosité ; il sortit de cette maison, et s'en alla tout le
 long du rivage de la Mer, suivi de Chrisante et de Feraulas ; pour voir si par hazard il ne trouveroit
 point encore du moins quelque chose, qui eust esté à sa Princesse. Il commanda mesme à ces
 Pescheurs, qu'il avoit laissez au bord de la Mer, d'aller tous le long des rochers, pour voir s'ils n'y
 descouriroient rien, de ce qu'il craignoit, et de ce qu'il desiroit tout ensemble de trouver. Jamais l'on
 n'a vû personne en un si deplorable estat : Chrisante et Feraulas n'avoient pas la hardiesse de luy
 parler : et luy mesme ne sçavoit pas seulement, s'ils estoient aupres de luy. Il marchoit en regardant
 le rivage : et s'imaginant que tout ce qu'il voyoit estoit le Corps de sa chere Princesse ; il y couroit
 avec une precipitation extréme : et s'y arrestoit apres, avec un redoublement de chagrin estrange.
 Enfin apres avoir esté fort loing inutilement, il se mit sur un rocher qui s'avançoit un peu dans la Mer ;
 comme pour attendre si les vagues ne luy rendroient point ce qu'elles luy avoient dérobé : et
 commandant encore une fois à tous ceux qui avoient commencé de chercher, de continuer leur
 queste ; il ne demeura que Chrisante et Feraulas aupres de luy : qui quoy qu'il leur peust dire, ne le
 voulurent point abandonner. Helas, que ne dit point ! et que ne pensa point ce malheureux Amant en
 cét endroit ! Ne suis-je pas, disoit il, le plus infortuné de tous les hommes ? et pourroit-on imaginer un
 suplice plus espouvantable, que celuy que je suis obligé de soufrir par la rigueur de ma destinée ?
 Ha ! belle Princesse, faloit-il que les Dieux ne fissent que vous montrer à la Terre ? Et ne vous avoient-
 ils renduë la plus adorable Personne du monde, que pour vous mettre si tost en estat de n'estre plus
 adorée ? Helas ! cruelles flames (s'écrioit il en regardant vers la Ville, dont on voyoit les ruines en
 esloignement) que j'avois de tort de vous accuser de la perte de ma Princesse ! et que je sçavois peu
 que ce seroit par un Element qui vous est opposé, que ce malheur m'arriveroit ! Toutes impitoyables
 que vous estiez, vous m'en eussiez au moins laissé les precieuses Cendres : et les miennes eussent
 pû avoir la gloire d'y estre meslées. Mais ô rigueur de mon Sort ! cette Mer inexorable ne me veut pas
 seulement rendre ma Princesse morte : et elle se contente de sauver la vie à son Ravisseur et à mon
 Rival. Encore la cruelle qu'elle est, si elle la luy eust conservée en estat de satisfaire ma haine et ma
 vangeance, j'aurois quelque legere consolation dans mon infortune : mais la Barbare, en retenant ma
 Princesse, me rend mon Rival, seulement pour me dire qu'il l'a veuë en un danger presques
 inevitable ; qu'il l'a veuë entre les bras de la Mort ; et qu'il l'a veuë dans des sentimens pour moy, que
 je n'osois esperer qu'elle eust. Et apres cela, il perd la parole, et demeure en estat de ne pouvoir
 servir de soulagement à mon desespoir. Du moins respondit Chrisante, vous avez la consolation de
 sçavoir qu'il ne l'a pas veuë morte : et que cét Arrest irrevocable, ne vous a pas esté prononcé. Ainsi,
 adjousta Feraulas, il vous est permis d'esperer, que le mesme fort de Mazare aura esté celuy de la
 Princesse ; et peut-estre mesme que le sien aura encore esté meilleur. Car comme elle n'aura pas eu
 le mesme regret de sa mort qu'il a eu de la sienne ; elle aura voulu vivre, au lieu qu'il a voulu mourir :
 et la douleur n'aura pas fait en elle, ce que le naufrage n'aura pû faire. Ouy, Seigneur, peut-estre
 qu'elle aura vescu ; et qu'elle vit presentement, sans autre inquietude que celle de se voir sans vous.
 Ha Chrisante ! ha Feraulas ! s'écria t'il, cette foible esperance, qui malgré moy occupe encore quelque
 petite place au fonds de mon coeur, est peut-estre un de mes plus grands malheurs : car si je ne
 l'avois pas, sçachez mes Amis, que sans m'amuser à des cris ; ni à des pleintes, j'aurois desja suivi
 l'illustre Mandane. Ce n'est donc que par ce foible espoir que je vis encore : Mais quoy que
 l'esperance soit un grand bien dans la vie ; et qu'elle soit appellée le secours de tous les malheureux ;
 elle est si debile dans mon esprit, qu'elle ne m'empesche pas de souffrir les mesmes douleurs que je
 souffrirois, si j'avois veû de mes propres yeux, la perte de ma Princesse. Ouy, Chrisante, je la voy
 dans la Mer recevoir comme avec chagrin, le secours de son Ravisseur ; je voy cette vague
 impitoyable, qui l'arrache d'entre les mains de celuy, qui apres l'avoir perduë la vouloit sauver ; et je
 voy cette mesme vague (ô Dieux quelle veuë et quelle pensée !) la sufoquer, et l'engloutir dans
 l'abisme. En disant cela, ses larmes redoublerent encore : et il se mit à baiser cette Escharpe qu'il
 tenoit, avec une tendresse extréme. O vous, s'écria t'il, qui fustes autrefois l'objet de mes desirs, et
 que je souhaitay comme la plus grande faveur que j'eusse jamais pû pretendre ; qui m'eust dit que je
 vous eusse deû recevoir avec tant de douleur, j'aurois eu bien de la peine à le croire. Je vous desirois
 alors, pour me donner le courage de vaincre les Ennemis du Roy, et de la Princesse : et je vous
 regarde aujourd'huy, afin que vous hastiez ma mort, en redoublant dans mon esprit desesperé, le
 triste souvenir de Mandane. Mais n'admirez vous pas, dit il à Chrisante, le caprice de ma fortune ?

file:///D|/Bureau/HTML/cyrus1.htm (15 sur 173)13/07/2003 16:32:12