Le Grand Cyrus partie 1

 la rigueur que ces mesmes Dieux avoient euë, pour une Princesse tres innocente. Cependant comme
 il avoit l'esprit entierement occupé, de la grandeur de sa perte ; il ne fit pas faire une plus exacte
 perquisition de la mort, et des funeraille de Mazare : et l'image de ce Ravisseur l'affligeoit si fort, qu'il
 l'esloigna de son souvenir autant qu'il luy fut possible. Comme il agissoit de cette sorte, l'on luy vint
 dire qu'il y avoit apparence que Ciaxare alloit arriver avec toute son Armée : parce que du haut de la
 Tour, l'on voyoit s'eslever sur un Vallon, une poussiere si grande et si espaisse, qu'il estoit aisé de
 juger que ce ne pouvoit estre que la marche de ces Troupes qui la causoit. Artamene fut fort esmeu à
 ce discours : et il le fut encore davantage, lors qu'il vit arriver Andramias, qui l'assura que Ciaxare
 seroit à Sinope, tout au plus tard dans une heure. Il voulut pourtant faire quelque effort sur luy : et il y
 travailla avec tant de succés, qu'il espera avoir assez de pouvoir sur sa douleur, pour en cacher une
 partie. Il commanda à tous les Chefs de ces Troupes, de les faire mettre en bataille : et il monta luy
 mesme à cheval, suivy de Thrasibule, d'Hidaspe, de Chrisante, d'Araspe, et d'Aglatidas, pour aller au
 devant du Roy ; qui à la veuë de Sinope, s'estoit détaché de son Armée : et marchoit accompagnée
 du Roy de Phrigie ; du Roy d'Hircanie ; de Persode Prince des Cadusiens ; du Prince des
 Paphlagoniens ; de celuy de Licaonie ; de Gobrias ; de Gadate ; de Thimocrate ; de Philocles ; et
 d'Artabase ; de Madate ; et d'Adusius, Persans, et les premiers d'entre les Homotimes : aussi bien
 que l'estoient Hidaspe et Chrisante, qui accompagnoient Artamene. Jamais entre-veuë ne fut si triste
 que celle-là : Ciaxare voyant de loing sa ville détruite, ne pût s'empescher d'en soupirer : et Artamene
 voyant Ciaxare, auquel il alloit donner un si grand redoublement de douleur, par la funeste nouvelle du
 naufrage de la Princesse sa fille ; ne pouvoit quasi se resoudre d'avancer vers luy. Cependant,
 quelque lentement qu'il marchast, comme le Roy venoit assez viste, ils furent bien tost à trente pas
 l'un de l'autre : Artamene et tous ceux qui l'accompagnoient, descendirent de cheval, et furent à pied à
 la rencontre du Roy, qui sembla se haster d'aller droit à luy.

                                       Colère de Ciaxare et arrestation de Cyrus


 Ce Prince malgrè sa douleur, luy presenta Thrasibule : et Ciaxare leur ayant tendu la main à tous, leur
 commanda de remonter à cheval ; et ayant appellé Artamene aupres de luy, il se mit à luy parler de
 son malheur en general ; et à exagerer combien il avoit esté surpris d'apprendre que Mazare eust
 enlevé sa fille. Seigneur, interrompit tristement Artamene, vous le serez bien encore davantage, lors
 que vous sçaurez que Mazare n'est plus : et que peut-estre. . . . . . A ces mots Artamene s'arresta : et
 ne pût jamais achever de dire, ce qu'il vouloit luy apprendre. Ciaxare le regardant alors tout troublé ;
 que voulez vous dire Artamene, luy demanda t'il, et quel nouveau malheur avez vous à m'anoncer ?
 Seigneur, luy respondit il, ce malheur est si grand, que je n'oserois presques vous le faire sçavoir : et
 je demande du moins à vostre Majesté qu'elle se donne la patience d'estre à Sinope, pour en estre
 pleinement instruite : afin que la douleur qu'il vous causera, puisse avoir moins de tesmoins dans
 vostre Cabinet, que vous n'en auriez à la campagne. Ciaxare estrangement surpris, d'un discours si
 obscur pour luy, regardoit Artamene : et luy voyant sur le visage et dans les yeux, toutes les marques
 d'une tristesse excessive ; il n'osoit plus le presser de luy apprendre ce qu'il mouroit d'envie de
 sçavoir, de peur de trouver ce qu'il craignoit de rencontrer : et d'estre contraint en effet de donner des
 marques de foiblesse, devant tant d'illustres Personnes. Il cherchoit donc dans les yeux d'Artamene,
 et dans sa propre raison, à devenir ce qu'il ignoroit : et par son silence, et par celuy d'Artamene, il
 estoit aisé de juger, que l'un craignoit de dire ce qu'il sçavoit, et que l'autre apprehendoit d'aprendre
 ce qu'il ignoroit. Cependant ceux qui estoient venus avec Artamene s'estans meslez avec ceux qui
 avoient suivi Ciaxare ; leur racontoient ce qui leur estoit advenu ; et cette funeste nouvelle qu'ils leur
 aprenoient, faisoit eslever parmi eux un murmure plaintif d'exclamations et d'estonnement ; qui
 raisonnant aux oreilles de Ciaxare, luy disoit encore, qu'il y avoit quelque chose d'estrange à sçavoir.
 Mais comme ils estoient alors assez prés de Sinope, toutes les Troupes qu'Artamene avoit amenées,
 suivant l'ordre qu'elles en avoient reçeu ; ayant paru sous les armes, et s'estans rangées en haye
 pour laisser passer le Roy ; il ne voulut pas devant tant de monde, satisfaire sa curiosité. Il marcha
 donc sans parler, jusques à tant qu'il fust arrivé au Chasteau : car pour son Armée, il avoit ordonné
 qu'elle camperoit dans une grande plaine, qui est entre un Vallon et la Ville : et qui estoit assez


file:///D|/Bureau/HTML/cyrus1.htm (18 sur 173)13/07/2003 16:32:12