Le Grand Cyrus partie 1

 secourir, tant ils estoient dignes de compassion, et tant il estoit sensible à leur misere. Cependant il
 avançoit tousjours : mais le bruit de sa venuë l'ayant pourtant devancé ; Aribée Gouverneur de
 Sinope, qui faisoit tous ses efforts, pour empescher que le feu ne gagnast la Tour, et qui occupoit en
 ce lieu, la meilleure partie de ce qui restoit de peuple et de soldats dans la Ville ; ne le sçeut pas
 plustost, qu'il se trouva dans une inquietude inconcevable ; et dans une incertitude, qu'on ne sçauroit
 exprimer : ne sçachant s'il devoit aller combattre, ou s'il devoit continuer de faire esteindre ce feu. Car,
 disoit il, que servira au Roy d'Assirie que je vainque, s'il est vaincu par les flames ? Mais que me
 servira t'il aussi à moy mesme d'esteindre ce feu, adjoustoit il, si je suis pris par Artamene ? moy qui
 suis son plus grand ennemy ; moy qui ay trahy le Roy mon Maistre ; moy qui ay servi à l'enlevement
 de la Princesse sa Fille ; et qui ay fait revolter ses Peuples. Ha ! non non, combattons Artamene, qui
 est aussi redoutable au Roy d'Assirie, que le feu et que les flames : et songeons à nostre
 conservation, en pensant à celle d'autruy. En disant cela, il commanda à ceux qui esteignoient le feu,
 et qui par des machines dont ils se servoient, taschoient de luy couper chemin, en abatant les
 maisons voisines, où il s'estoit attaché ; de prendre des armes s'ils en avoient ; d'en aller chercher en
 diligence s'ils n'en avoient point ; ou de s'en faire de tout ce qu'ils rencontreroient ; et mesme du feu et
 des flames ; plustost que de ne le secourir pas. Apres donc qu'Artamene eut traversé une partie de
 cette Ville embrazée ; et qu'ayant marché tout le long du Port, il fut arrivé proche de la Tour ; il fut bien
 surpris de voir que personne ne travailloit plus pour esteindre le feu, et qu'Aribée s'avançoit pour le
 combattre. Quoy, s'écria-t'il, je viens pour esteindre ces flames, et ce sera moy qui empescheray
 qu'on ne les estéigne ? Ha ! non non, mes Compagnons, il ne le faut pas. En disant cela, il commanda
 à une partie de siens, de songer à faire ce que les autres ne faisoient plus ; pendant qu'il combatroit
 ceux qui sembloient en avoir envie. Comme il estoit en cét estat, et qu'il s'avançoit vers le gros, à la
 teste duquel estoit Aribée ; il leva les yeux vers le haut de la Tour : et y reconnut le Roy d'Assirie : qui
 par une action toute desesperée, sembloit n'avoir autre dessein, que de choisir s'il se jetteroit dans les
 flames ou dans la Mer. Cette veuë ayant encore confirmé Artamene, dans la croyance que sa
 Maistresse n'estoit pas morte ; il redoubla les commandemens qu'il avoit desja faits, d'esteindre ce
 feu ; et marcha teste baissée vers ses Ennemis, qui venoient à luy, avec assez de resolution. Comme
 il fut proche d'eux, et qu'il reconnut distinctement qui estoit leur Chef ; Aribée, luy cria t'il, je ne viens
 pas aujourd'huy pour te combatre, et pour te punir : et il ne tiendra qu'à toy, que je n'obtienne ton
 pardon du Roy des Medes, si tu veux mettre les armes bas ; et m'ayder à, sauver ta Princesse et la
 mienne. Mais Aribée, qui croyoit son crime trop grand, pour luy pouvoir estre jamais pardonné ; et qui
 de plus, avoit appris une chose, qu'Artamene ignoroit encore ; au lieu de luy respondre, s'eslança vers
 luy l'espée haute, et commença un combat au milieu des feux et des flames ; qui n'estoit pas moins
 redoutable, par ce qui tomboit d'enhaut, que pour les coups qui partoient de la main d'un Ennemy
 invincible ; que l'Amour, la Haine, et la Vangeance, rendoient encore plus vaillant qu'à
 1'accoustumée ; quoy qu'il fust toujours le plus vaillant homme du monde. Hidaspe, Artucas,
 Chrisante, Aglatidas, et Araspe ; se rangerent aupres d'Artamene : car pour Feraulas, ce fut luy qui
 eut ordre de faire continuer d'esteindre le feu. Ainsi le Roy d'Assirie voyoit tout à la fois, travailler à
 son falut et à sa perte ; vouloir sauver sa vie, et vaincre celuy qui l'avoit servi. Encore (disoit Artamene
 en luy mesme, et en jettant les yeux vers le haut de la Tour, où il voyoit tousjours son Rival) si ma
 Princesse regardoit ce que je fais pour la sauver, je serois bien moins malheureux : et si j'estois
 asseuré qu'elle vist ma mort, ou ma victoire, je n'aurois presque rien à desirer. Cependant la meslée
 se commence, et se continuë fort chaudement : et sans qu'Artamene cesse de fraper, il ne laisse pas
 d'avoir soin de voir si Feraulas fait bien executer ses ordres. Enfin dans cette confusion, il s'attache en
 un combat particulier contre Aribée, qui fut dangereux et opiniastré : car quoy que ce traistre eust en
 teste le plus redoutable des hommes, le desespoir faisoit en luy, ce que la valeur n'auroit pû faire en
 un autre. Neantmoins comme au contraire, Artamene combatoit alors avec espoir ; et qu'il estoit
 persuadé, qu'il n'y avoit plus que quelques murailles entre sa Princesse et luy ; il fit des choses
 prodigieuses. Il tua tout ce qui s'opposa à son passage ; et blessa Aribée en tant de lieux, qu'enfin il
 se seroit sans doute resolu de se rendre ; si tout d'un coup une maison enflamée ne fust tombée si
 prés du lieu où ils combatoient, qu'Aribée en fut enseveli sous ses ruines : et l'on creut qu'il avoit peri
 par le fer et par le feu, pour expier une rebellion criminelle, qui meritoit tous les deux ensemble.
 Artamene qui n'avoit pû estre blessé par son Ennemy, pensa estre accablé en cette rencontre, et se
 vit tout couvert de flame ; tout environné de charbons et de fumée : et s'il n'eust mis son Bouclier sur

file:///D|/Bureau/HTML/cyrus1.htm (5 sur 173)13/07/2003 16:32:12