Le Grand Cyrus partie 1

 vistesse, que ces deux Rivaux la perdirent de veuë en un instant : et perdirent avec elle, tout ce qui
 leur restoit d'esperance, voyant tousjours durer l'orage aussi fort qu'auparavant. Que ne dirent point
 apres cela, ces deux illustres malheureux ; dans la crainte qu'ils avoient, voyant continuer la
 tempeste, que leur Princesse ne fist naufrage ? Ils eussent bien voulu pouvoir separer Mazare de
 Mandane ; et ne luy donner point de part aux voeux qu'ils faisoient pour elle : mais apres tout, ils
 consentoient au salut du Rival, plus tost que de se consentir à la perte de la Maistresse. Ils se la
 souhaiterent mesme plus d'une fois l'un a l'autre, plustost que de la sçavoir exposée au danger où elle
 estoit : et plus d'une fois aussi, ils se repentirent de leurs propres souhaits. Cependant cét objet qui
 avoit comme suspendu toutes leurs passions, et toutes leurs pensées, n'estant plus devant leurs
 yeux ; ils recommencerent de se regarder comme auparavant : c'est à dire comme deux Rivaux, et
 comme deux Ennemis. Artamene estoit pres de s'en aller, et de commander que l'on gardast le Roy
 d'Assirie ; lors que ce Prince luy dit, je sçay bien que ta naissance est égale à la mienne : et je le sçay
 par des voyes si differentes, et si asseurées, que je n'en sçaurois douter : c'est pourquoy me confiant
 en cette generosité, de laquelle j'ay esté si souvent le secret admirateur malgré ma haine ; et que j'ay
 si souvent esprouvée ; je veux croire encore, que tu ne me refuseras pas une grace que je te veux
 demander. Comme à mon Rival, luy respondit Artamene, je te dois refuser toute chose : mais comme
 au Roy d'Assirie, je te dois accorder tout ce qui n'offensera point le Roy que je sers, ou la Princesse
 sa fille : c'est pourquoy fois asseuré que je ne te refuseray rien de tout ce qui ne choquera point ny
 mon honneur, ny mon amour : et je t'en engage la parole d'un homme, qui comme tu dis, n'est pas de
 naissance inégale à la tienne, quoy qu'il ne passe pas pour cela, dans l'opinion de toute la Terre.
 Demande donc ce que tu voudras : mais consulte auparavant ta propre vertu, pour ne forcer pas la
 mienne à te refuser malgré elle. Le Roy d'Assirie voyant qu'il avoit cessé de parler ; je sçay bien, luy
 dit il, que tu peux me remettre entre les mains de Ciaxare : et qu'apres luy avoir conquis la meilleure
 partie de mon Royaume, il te seroit en quelque façon avantageux, de luy en remettre le Roy dans ses
 fers. Mais tu és trop brave, pour vouloir que la Fortune t'ayde à triompher d'un homme fait comme
 moy ; et pour te prevaloir de la captivité d'un Rival, que tu ne sçaurois croire qu'homme de coeur, puis
 qu'il à desja mesuré ton espée avec la tienne. Dans les termes où est ma passion pour la Princesse,
 je ne te celle pas qu'il faut de necessité que je meure avant que tu la possedes : ne me prive donc pas
 inutilement de la gloire d'avoir contribué quelque chose, à la punition de nostre Ennemy commun, et à
 la liberté de la Princesse : te promettant apres cela, quand mesme le destin me seroit favorable, et me
 feroit retrouver l'illustre Mandane ; de ne songer jamais à la persuader à ton prejudice ; que par un
 combat particulier, le fort des armes n'ait decidé de nostre Fortune. je voy bien, Artamene, adjousta
 t'il, que ce que je veux est difficile : mais si ton ame n'estoit capable que des choses aisées, tu serois
 indigne d'estre mon Rival. Il est vray, reprit Artamene, qu'il ne m'est pas aisé de faire ce que tu
 desires : et qu'il me fera bien plus facile, de terminer nos differens, te faisant redonner une espée ;
 que de t'accorder cette liberté que tu me demandes ; et qui n'est pas peut-estre tant en mon pouvoir
 que tu le crois. Comme mon amour n'est pas moins sorte que la tienne, reprit le Roy d'Assirie, peut-
 estre que le desir de combattre n'est pas moins violent dans mon coeur, que dans celuy d'Artamene :
 Mais comme je ne veux combattre Artamene que pour la possession de la Princesse ; et qu'elle n'est
 pas en estat de pouvoir estre le prix du Vainqueur ; il faut Artamene, il faut aller apres le Ravisseur de
 Mandane, et travailler conjointement à sa liberté, y ayant égal interest. Ne consideres tu point que si
 nous perissions tous deux dans ce combat, Mandane, l'illustre Mandane, demeureroit sans protection
 et sans deffence, entre les mains de nostre Rival ? A ces mots, Artamene s'arresta un moment : puis
 reprenant la parole ; il ne seroit sans doute pas juste, dit il, d'exposer nostre Princesse, à un
 semblable malheur : mais il n'est pas équitable non plus, que commandant les armes du Roy des
 Medes, je dispose souverainement de la liberté d'un prisonnier, comme est le Roy d'Assirie. Tout ce
 que je puis avec honneur ; c'est de luy promettre, d'employer tous mes soins, et tout mon credit, pour
 la luy faire rendre, s'il m'est possible, et de n'oublier rien pour cela. Mais pour luy tesmoigner, adjousta
 t'il, que je ne veux pas m'espargner la peine qui se rencontre à combattre un si redoutable Ennemy ;
 ny m'en exempter laschement, en le retenant prisonnier ; je veux bien luy engager ma parole, de ne
 pretendre jamais rien à la possession de la Princesse, quand mesme elle seroit en ma puissance ;
 quand mesme le Roy des Medes y consentiroit ; et quand mesme elle le voudroit, qu'auparavant par
 un combat particulier ; le sort des armes ne m'ait rendu son Vainqueur. Je ne sçaurois nier, luy dit le
 Roy d'Assirie, que vous n'ayez raison d'en user comme vous faites ; et que je n'aye eu tort de vous

file:///D|/Bureau/HTML/cyrus1.htm (8 sur 173)13/07/2003 16:32:12